تعالوا نحارب الهروين

قاعد تفكر ومزاجك معكر وعايز تشم فلوسك ضاعت وعيالك تاهت وشايل هم يا عم كفاية  إيه الحكاية فكر شوية الدنيا غدارة وضعت يا خسارة وكفاية شم ، تعالوا نحارب الهروين  والشم  والشمامين هتفضل تشم وتموت بالسم وتعيش مسطول ، عاوز علاج وكفاية المزاج كدة مش معقول وأنت يا حلوة يا رمز الجمال يا خفة وأنوثة ورقة ودلال شمه واحدة تدمر حياتك وتضيع المحاسن ويروح الجمال  تعالوا نحارب الهروين  والشم  والشمامين

كنيسة السيدة العذراء و الشهيد أبانوب بأمبابة

          خدمة القديس أغسطينوس للإدمان      

أنا طير في السما طاير

أنا طير في السما طاير                                 والأرض من تحتي والجبال

وفى ملكه أنا حائر                                      من كتر ما فيها من جمال

لا هموم الأرض أنا شايلها                              ولا شيءعليا محال  

وكل ما في الأرض أنا أملكه                           من الجنوب للشمال

السلطان و الجاه معايا                                 وبنات حواء و كتير من المال

عالم جميل ورائع                                       لكنه للأسف خيال في خيال

أوهام بنعيش فيها                                      بعدها حسرة وحزن وألام

ومن حالة أسوأ لحالة                                  أخيرها ضياع الحال

فالعقل بلا تركيز                                        و الفكر في الخيال جال

                                                                                مريت نجيب

                                                                                صفاء نصيف

                                                                        دارستان بمركز تدريب الحياة الأفضل

                                                                    الدفعة الثانية 2007

 مشاعر مدمن متعافي

ربي يسوع كم مرة اتخدعت

وكلام صحابي.........سمعت

دخلت سكك مش بتعتي وتهت

تركت أهلي وأحبابي وضعت

لفيت سيجارة ودخنت شيشة

خدعت نفسي بحت حشيشة

برشام وماكس وأفيون

لغاية لما وصلت مرحلة الجنون

مش لاقي غير حضنك ملجأ أخير

واثق أنك ممكن تعمل معايا كثير

انت منقذي وأبويا وقلبك كبير

ومفيش امر عليك عسير

                                                                                ناجي طوبيا  

                                                                       دارس بمركز تدريب الحياة الأفضل

                                                                                الدفعة الثانية 2007

  البداية واللا النهاية

نبتدي منين الحكاية البداية واللا النهاية

                                  البداية كانت سيجارة و النهاية فيها مرارة

البداية كانت سيجارة ضحكة حلة مع صديق

                                دخلت فيها بقلب جامد وفجأة ضليت الطريق

مشيت مشوار وكملته وكل شيء جربته 

                                من بودرة وأفيون وحشيش وبانجو شربته

قالولي اشرب وانسي هاتبقي إنسان جديد

                                أتاريه قصدة انسي إني أكون في يوم سعيد

واستمرت الطاحونة في طحن كل شيء جميل 

                                من الراحة والسعادة والرجوع بقي مستحيل

نفسي الزمان يعود وارجع وأكون موجود

                                واقول للشيطان لأ مفيش ما بينا وعود

ياللى سمعتوا حكايتي خافوا من النهاية

                                   بدايتي كانت سهلة وطحنتني الرحاية 

                                                                                        جرجس فوزي

                                                                       دارس بمركز تدريب الحياة الأفضل

                                                                                الدفعة الثانية 2007

                                    حشيش مفيش

حشيش مفيش                                 والشارع مافهوش حتي شاويش

والناس علي الرصيف نايمة                     بعد الأحلام علي الريش

أصل العقل فاضي                               والجيب بيقول مفيش

مش لاقين حاجة يعملوها                      والعقل كله تشويش

والجسم نار قايدة                                بس معلم الصنف ما بيبقيش

والوظيفة طارت                                   وحساب البنك عل الحشيش

والعمارة وكمان البيوت                          وأدى حايتنا بقت شيش بيش

ومراتي والعيال ضاعوا                          والمجتمع مأبلنيش

ولأنني مرحمتش نفسي                      هو كمان مارحمنيش 

مين صدرة واسع                                يضمني فيه وما يرفضنيش

دا الشيطان خلاص سابني                   بقاله فترة ماحاربنيش   

بيقول كفاية عليه                               الإدمان أصله شيطان خبيث

                                                                           صابر ناجي

                                                                      دارس بمركز تدريب الحياة الأفضل

                                                                                 الدفعة الثانية 2007

                                                      سيجارة                                

خرجت في يوم ادور علي سيجارة

                                                 كانت واقفة علي ناصية حارة

وقفت أتفرج مع ناس كتير

                                                مين بيضحك مين روحة فرحانة

بصيت ليها بنظرة قوية وحادة

                                                وقلت يا واد اشتريها بالمادة

ردت وقالت ثمني مش فلوس

                                                دا بقلبك تاخدني بمحبة زيادة

مسكتها بايدي وضميت عليها

                                                وميلت ليها وقبلتها

ضحكت وقالت هانبقي حبايب

                                               سيبك من الناس والدنيا وهمها

دخلت جوايا في عشرة طويلة

                                               وجوا قلبي سكنتها

عاشت وكبرت وجذورها فرعت

                                               وبدأ قلبي يشرب سمها

وفروعها كبرت وملأت عروقي

                                               يا مين يخلع مني جذرها

تعبت معاها سنين كثير

                                               والقلب مابقاش قادر وقتها

دخلت عيادة ومن سرير لسرير

                                              في أيدي سيجارة وبفمي أختها

حضر الطبيب وفي أيده سماعة

                                              يسمع كلامها وموتي سعدها

مكاني مليته وبعدي مفيش

                                               صحة ترجع تاني عشها

يا ناس دي كانت علي ناصية حارة

                                              نهايتي واقفة ما كانتش سيجارة

                                                                        نشأت نجيب

أخصائي اجتماعي بمركز الحياة الأفضل

خسـاره

تكون أول طريق الهلاك                                مع صاحب شكله زى الملاك

يتكلم عن الانطلاق والحرية                          وهو أسير سيجارة وشهوه رديه

يقولك خليك راجل                                     والحقيقة أنه بيك بيتاجر

والسيجارة تجر مخدرات                               والإدمان في جسمك خلاص بات

عايز فلوس بس مش لاقي                           واسمع الكلام لسه له باقي

يقولك تعالي نسرق فلان وفلانه                     وأنت مسكين نفسك من الخطية غفلان

تمشى وراه مش عارف الطريق                       تمشي وراه عدو مش صديق

يقولك تعالي نروح الحته الفلانية                      فيها أجمل ما شافت عنيا

وأدي تاني حفره بيرميك فيها                          وحدة في حبك ليها

تعمل أية وأنت من البداية                             أسير خطيه وسيجارة

بجد ما بقت النهاية                                     عواطف كدابة وحب خسارة

أوعي اليأس يدخل قلبك                              وأوعي يقل حبك لربك

مهما عملت أو سويت                                 ها يقبلك بين أحضانه

ويقول دأنا ليك فديت                                   ويحسسك بحبه وحنانه

يا بختك بالمسيح اله بيبحك                          حب من غير مقابل ولا شكر

لازم حبك ليه يوصل                                    لدرجة العشق والشكر

شكر بحب اللي فداك                                 بعدما كنت أسير شهوه رديه

دور عليك ونجاك                                        من أبحار وأوحال الخطية

فله قدم التسبيح                                      يا ابن المسيح الذبيح

                                                     تأليف: مجدي جمال صدقي.

كنيسة: السيدة العذراء والملاك ميخائيل ـ مؤسسة الذكاه.